27.04.12

EBITDA 123 mkr á fyrsta ársfjórðungi

Hagnaður Nýherjasamstæðunnar á fyrsta ársfjórðungi 2012 er tæpar 15 mkr á fyrsta ársfjórðungi 2012 og EBITDA er 123 mkr. „Afkoma af innlendum rekstri er ágæt, en afkoma af erlendri starfsemi er undir áætlun," segir Þórður Sverrisson forstjóri Nýherja. Hann segir eftirspurn eftir tækniþjónustu vaxandi. Þá hafi sala á eigin hugbúnaðarlausnum hjá TM Software aukist mikið. „Einkum er mikill vöxtur í sölu á Tempo tímaskráningarkerfi TM Software."

Aukin eftirspurn er eftir alrekstrarþjónustu, þar sem Nýherji annast allan tölvurekstur viðskiptavina, gegn föstu mánaðargjaldi. Tæknisérfræðingar Nýherja hafa unnið að ýmsum stórum uppsetningum í ársfjórðungnum, svo sem á IBM, TSM afritunarbúnaði, IBM Storwise gagnageymslukerfi og Office 365 skýlausnum. Verkefni tæknisviðs fara vaxandi og voru verkefni fleiri í mars en nokkru sinni áður í einum mánuði.

Rekstur og afkoma Applicon í Svíþjóð, sem leggur áherslu á þjónustu við banka og fjármálafyrirtæki var í samræmi við áætlanir. Meðal verkefna var uppsetning á Calypso lausnum fyrir sænska banka. Þá er innleiðing á SAP bankalausn fyrir Landshypotek vel á veg komin. Verkefnastaða félagsins er góð og áætlanir gera ráð fyrir áframhaldandi jákvæðri afkomu á árinu.

Applicon A/S í Danmörku hefur unnið að þróun og uppsetningu á umfangsmikilli lausn fyrir sjúkrahús í rekstri Region Hovedstaden á Sjálandi síðastliðin 2 ár. Lausnin var afhent í fyrsta ársfjórðungi og var tekin í rekstur á sjúkrahúsinu í Herlev, sem er fyrsta sjúkrahúsið af 12, þar sem þessi lausn verður innleidd. Kostnaður vegna þessarar uppsetningar hefur farið mikið fram úr áætlun og valdið tapi í rekstri Applicon A/S. Aðgerðir núverandi stjórnenda hafa miðað að því að tekjur félagsins verði betur tryggðar og dregið verði úr áhættu. Tekist hefur að lækka kostnað af starfseminni og eru því horfur á því að afkoma verði betri á síðari árshelmingi.

Jákvæð afkoma var af rekstri Dansupport A/S í Danmörku, sem sérhæfir sig í innviðum upplýsingatæknikerfa. Hægur bati er í eftirspurn hjá meðalstórum og smærri fyrirtækjum eftir tæknibúnaði og þjónustu. Horfur í rekstri Dansupport eru ágætar á árinu.

Árshlutauppgjör í heild sinni.

Nýherji

<< Til baka

Fyrirspurn